Soorat dikhi aaine me ek
Apni nahi thi
Jaani pehchaani, fir bhi
Andekhi anjaani si lagi
Jaise parchayi ho
Mere chehre pe koi
Palak jhapkai to hawa ho gayi
Chalawa tha shayad
Khauffzada karna tha use, shayad
Par ek dard mehsoos kiya maine
Uski aankho me
Ek pal bhar me, jaise
Koi kahani kehna chahta ho
Baarish ke baad bikhre badal sa
Jaisi vedna bayan karna chahta ho
Par na Jane kyu achanak, hi bas
Hawa ho gaya
Din beete, mausam badle
Saathi badle, afsaane badle
Par zehan me tha vo bhi
Kisi kone me, ek ajab veerane sa
Vo chehra
Vo soorat aaj fir nazar ayi
Tehalte hue, sadak par
Is baar asliyat liye aankho me
Sapna ho jaise
Meri kahani se bhi zyada pecheeda
Par khoobsoorat thi
Uski soorat,
Kuch ehsaas tha usey bhi shayad
Tabhi mujhe dekhkar muskurayi vo
Fir Meri aankhe us par tiki jaankar,
Khilkhila kar has padi,
Chal padi aage mooh modkar
Bas vahin kambakht dil apna
Bekaaboo ho gya
Socha peeche mudke dekhegi
To keh sunayenge poora kissa
Par na vo mudi
Na hamne kissa kaha
Afsaana banne se pehle hi
Dil beech bazaar be-aab-aroo ho gaya..
Incessant Whispers 